بوست أمس والنهاردة وبكرة : وائل لطقي
طبعا فدوى مواهب اقل بكتير من ان أنا ادرسها كشخصيّة لكن أنا ممكن اتكلم عنها كنموذج ..هي في فريق التطرف الديني اللي استلم مقاولة تغيير مصر من السبعينات عاملة زي لاعب كرة في خط الوسط ..جناح ايمن مثلا ..
المركز ده لازم حد يشغله وفق خطة المدرب ..لو اعتزل لاعب بينزل لاعب تاني اصغر ..فهي واحدة من الشريحة العليا في الطبقة الوسطي بتشتغل حاجة ليها علاقة بالاعلام وبتجمع بين أنوثة واضحة وخطاب محافظ ..
وكلامها في الدين نفسه لا يخلو من دلال أنثوي ..ودورها تشتغل علي ستات النخبة الاقتصادية والفنية
..اول واحدة عملت الدور ده في السبعينات كانت المذيعةكريمان حمزة ..كانت سيدةً جميلة والشيخ الغزالي ضمها للاخوان عكس أخواتها جيلان وناريمان وده لان والدها كان له علاقة قديمة بالإخوان فمادام السادات جه والخطة اتغيرت مفيش مانع انها تبقي اخوان
فبتقول في مذكراتها انها مع بداية السبعينات خلعت الميكروجيب وارتدت الحجاب وابتدت تقدم برامج دينية ولما حصل الصدام بين الاخوان والسادات قبل اغتياله اتوقفت عن العمل لكن الرئيس مبارك رجعها وخلاهم نزلوا صورتها علي غلاف مجلة الاذاعة والتلفزيون بالحجاب كمان !!
قدمت كل الدعاة الجدد والاخوان في اهم منبر اعلامي وقتها عمر عبد الكافي ياسين رشدي ،عمرو خالد ،وكان كل واحد منهم بيتحول من مجهول لنجم بعد ظهوره معاها في رمضان ..ده التلفزيون المصري يا جدع ..
بتحكي قصة مريبة جدا ان في جهة ما اعترضت علي استضافة عمر عبد الكافي في رمضان ..فجه شخص قريب جدا من وزير الاعلام وقال لها ايه رايك ننتج له حلقات جديدة تبع شركة الانتاج بتاعتي ..والحلقات تم انتاجها واتذاعت في التلفزيون المصري برضه !!وموش هقول لك المنتج المجهول ده كان شغال ايه 
بس هي قايلة في المذكرات ..
بس هي قايلة في المذكرات ..علي جنب كانت بتنظم دروس في البيوت لسيادات الطبقة الراقية وبتاخد الدعاة دول تعرفهم علي زوجات وبنات حكام مصر ونخبتها وتنظم عروض أزياء إسلامية للمحجبات فيها الشياكة والدلال والدلع والاسلام برضه ..
وكانت بتعمل مجلة أزياء للمحجبات بتوع الطبقة الراقية (الغلابة دول بيشتغل معاهم السلفيين مالناش دعوة بيهم )..علي جنب كانت شغالة في كل المؤسسات السعودية وقتها زي رابطة العالم الإسلامي ومنظمة الاقتصاد الإسلامي واي حاجة بتنهي بكلمة اسلامي ودي حاجات كان فيها فلوس كتير
..ونشاطها كانت بتديره لجنة مصغرة من ثلاث سيدات من أثرياء الاخوان واحدة منهمً من عيلة البليدي ..بعد خروج كريمان علي المعاش ظهرت اسماء اخري بتلعب في نفس المنطقة لان ده مركز في اللعب مينفعش يبقي فاضي منهمً مذيعات غيروا موقفهم من الاخوان بعد سقوطهم انما في الالفينات كانوا بيلعبوا في المركز ده زي دعاء عامر ودعاء فاروق –
أنا بتكلم علي الماضي اللي درسته موش علي الوقت الحاضر -ودلوقتي اللي بتلعب في المركز فدوى مواهب ..اللي هي من نفس الوسط وعلي علاقة قوية بأوساط الفن والطبقة اللي ممكن وصفها بالراقية تجاوزا واللي انتماءها لهم بيحميها هي نفسها من ردود الفعل علي اللي بتعمله لان العلاقات متشابكة وهي بتدرس لأولاد ناس والناس بيتوسطوا لها ..وهكذا وهكذا وهكذا
المادة العلمية من كتاب (دعاة عصر مبارك )